الــبــیـــرونــی، الخـــوارزمــی، الــفـــاراب اولادیــدن

اصلی نسلی بلکی اۉزلـوق، بلکی ترخان، اۉزبېگـیـم

اۉتـدیـلـر شـورلـیـک باشـینگدن اۉیناتیب شمشیـرلریـن

نـیـچـه قاآن، نـیچه سلطان، نیچه مینگ خان، اۉزبېگیم

تاغـلـریـنـگ تیگـرنگـده گـۉیـا بوغـمـه اجــدر بۉلـدی و

ایککی دریا، ایککی چشمینگ، چشمی گریان، اۉزبېگیم

قـیـصـری روم نــیـــزه سـیـدن بغـریــده داغ اوزره داغ

چـیـنـگـیـز و باتـو تـیـغـی گـه کـۉکسی قـلقان، اۉزبېگیم

یاغـدی تـۉرت یانـدن عـصـرلـر باشینگ گه تیـری کمـان

عـمـری قـربان، مُـلکـی تـاراج، یـورتی ویران، اۉزبېگیم

دور ظـلمـیگـه و لـیکـن بـیـر عــمـر باش ایـگـمـه دیـنـگ

سـیـن مـقـنـع، سـربـدار، سـیـن ایـرکـسیور قان، اۉزبېگیم

سـیـن نـه زرتـشت، سـیـن نـه بـودی، سینگه نه آتش صنم

آدمــیـلـیـک دیـنـی بـیـرلــه تــازه ایـمـــان، اۉزبېگــیــم

مـعـرفـت نـیـنـگ شـعـلـه سـیـگـه تـالـپـیـنـیـب ظـلمـت ارا

کـۉزلـرینـگـدن آقـتـی تـونـلــر کـوکـبـسـتـان، اۉزبېگـیـم

تـوزدی و مـیـرزا اولـــوغ بـیــک کـــورگـانــی جــدولـیـن

سِـرلـی آسـمـان طـاقـیـگـه ایـلـک قـۉیـدی نروان اۉزبېگیم

مـیـر عـلـی شـیـر نـعـره سـیـگـه عکـس-صدا بیردی جهـان

شـعـریـت نـیـنـگ مُـلکـیـده بۉلـدی شاه و سلطان، اۉزبېگیم

عـلـم و شـعـر ده شـاه و سـلـطـان، لـیـک تـقــدیـریـگـه قـول

اۉز ایـلـیـده چـیـکــدی غـربـت زار و نــالان، اۉزبېگــیـم

مـیـرزا بـابـر، سـیـن فـغـانـیـنـگ سالدی عالـم اوزره اۉت

شـاه مــشـرب قـانـی سـیـنـده اوردی طـغـیـان، اۉزبېگـیم

شـعـریـت نـیـنـگ گـلـشـنـیــده ســۉلــدی مــحــزون نـادره

سـیـم تـنــنی یـودی کـۉز یـاش، کـۉمـدی ارمان، اۉزبېگیم

یـیـغـلـه دی فـرقَــتـده فـرقـت، هـم مـقـیـمـلـیـکـده مـقـیـمی

نـالـیـشـیـنگـدن هـنـد و افـغـان قـیـلـدی افـغان، اۉزبېگـیم

تاریـخـیـنگ بـیتـمککه خـلقـیم میـنگـته فـردوسی کـیره ک

چونکی بیر بار چیککن آهینگ مینگـته داستان، اۉزبېگیم

آرتـده قـالـدی کـۉهـنـه تـاریخ، آرتـده قـالـدی درد، سـتــم

کیتتی وهمینگ، بیتتی زخمینگ، تاپتی درمان اۉزبېگـیم

بـۉلـدی آسـمـانـیـنـگ چـراغـان، طـالع خـورشیــدی بیلـن

بـۉلـدی عـصـری تـیـره شـامـینگ شعله افشان، اۉزبېگیم

مـیـن وطـنـنـی بـاغ دیـب اَیـتـسـم سـیـنـسن اونده بیتته گـل

مـیـن وطـنـنـی کــۉز دیـب ایتسم بـیتـته مژگان، اۉزبېگیم

فـخـر ایـتـرمـن آنـه خـلـقـیـم کـۉکـره گـیـمـنـی تاغ قـیلـیب

کـۉکـره گـیـده تـاغ کـوتـرگـن تَــنـتـی دهـقـان، اۉزبېگـیم

اۉزبېگـیـم دیب کینگ جهانده نی اوچون مدح ایـتمه یـین!

اۉزلـیـگـیـم بـیـلـمـاقـقـه دوریـم بـیـردی امکـان، اۉزبېگـیم

مـیـن بـویوک یورت اوغلی دورمن، مین بشر فرزندی من

لیـکـن اول سـیـنـگـه بـۉلـسـم صـادق اۉغـلان، اۉزبېگـیـم

مـیـنـگـه پـوشـکـیـن بـیـر جهـان و مـینگه بـیران بیر جهان

لیک نوایی دیک بابام بـار کـۉکـسـیـم آسـمـان، اۉزبېگـیـم

قَـیـده بـارمـه ی، بـاشـده دۉپـپـیـم، شـهـرتـیم، قدریم بویوک

عـالـم اوزره نـامـی کـیـتـگـن اۉزبـیـکـیـسـتـان، اۉزبېگـیم

بـو قـصـیـده سـیـنـگـه خـلـقـیـم، آق سـوت و تــوز حـرمـتـی

ایرکین اۉغـلـینـگـمن، قبـول ایت، اۉزبېگیم، جان اۉزبېگیـم